पुणे : कामाच्या ठिकाणी आपल्या विभागातील पिण्याचे पाणी संपले असेल, किंवा स्वच्छतागृहे स्वच्छ नसतील, तर आपण संबंधितांकडे तक्रार नोंदवतो आणि समस्या सोडवली जाण्यासाठी वाट पाहतो. अशा प्रसंगांमध्ये जाणारा वेळ आणि होणारी गैरसोय टाळून साध्या ‘क्यू-आर कोड’च्या माध्यमातून आपली गरज व्यवस्थापकांपर्यंत पोहोचवणाऱ्या पुण्यातील ‘सिग्मापेरॉन’च्या ‘असिस्ट-डी’ या रिअल टाईम व्यवस्थापन सोल्यूशनला यंदाच्या ‘पुणे कनेक्ट’मध्ये सर्वोत्कृष्ट स्टार्टअप पुरस्काराने गौरविण्यात आले आहे. प्रसिद्ध तालवाद्यवादक तौफिक कुरेशी यांच्या हस्ते या पुरस्कारांचे वितरण करण्यात आले.
सॉफ्टवेअर एक्सपोर्टर्स असोसिएशन ऑफ पुणे अर्थात ‘सीप’तर्फे ‘पुणे कनेक्ट’ या परिषदेचे आयोजन करण्यात आले होते. या वेळी स्टार्टअप स्पर्धेतील विजेत्यांना पारितोषिके प्रदान करण्यात आली. सीपच्या कार्यकारी समितीचे सदस्य व पुणे कनेक्टचे प्रमुख अभिजित अत्रे, सीपचे अध्यक्ष अश्विन मेघा, उपाध्यक्ष विद्याधर पुरंदरे, ‘पुणे कनेक्ट’चे कार्यक्रम संचालक स्वप्नील देशपांडे या वेळी उपस्थित होते.
पाणीटंचाई असलेल्या भागात दुरून पाणी आणणे सोपे करणाऱ्या ‘नीर चक्र’ या उपकरणासाठी ‘ट्री इनोव्हेशन फाउंडेशन’ या स्टार्टअपला द्वितीय पुरस्कार प्रदान करण्यात आला, तर कंपन्यांच्या कर्मचाऱ्यांना ‘शेअर्ड मोबिलिटी सेवा’ पुरविणाऱ्या ‘ऑल माइल्स’ या स्टार्टअपला तृतीय पुरस्काराने गौरविण्यात आले. या वर्षी पुणे कनेक्टसाठी ७५ स्टार्टअपकडून अर्ज आले होते. त्यातील निवडक ३४ स्टार्टअपमधून अंतिम पाच स्टार्टअपना माहिती तंत्रज्ञान क्षेत्रातील तज्ज्ञांसमोर सादरीकरण करायला मिळाले. त्यातून तीन विजेत्यांची निवड करण्यात आली. ‘अलॅक्रिटी’चे गिरींद्र कसमळकर, ‘रोल्सरॉइस’च्या पार्टनरशिप एंगेजमेंट विभागाच्या प्रमुख राजश्री राव, ‘केपॉइंट’चे संस्थापक श्रीधर शुक्ला यांनी या स्पर्धेचे परीक्षण केले.
याशिवाय परिषदेत या वर्षीपासूनच सुरू करण्यात आलेल्या कॉर्पोरेट पुरस्कारांमध्ये ‘सिनेक्रॉन’ला ‘बेस्ट इनोव्हेशन अंत्रेप्रिन्युअरशिप स्ट्रॅटेजी’ पुरस्कार प्रदान करण्यात आला. ‘एक्स्पान्शिअन’ कंपनीस ‘बेस्ट इंडस्ट्री अॅकॅडमिआ कनेक्ट’ पुरस्काराने, तर ‘थॉटवर्क्स’ कंपनीस ‘बेस्ट डायव्हर्सिटी अँड इन्क्लूजन स्ट्रॅटेजी’ पुरस्काराने गौरविण्यात आले.